CRISTIANO RONALDO AKWAA KISIKI

                           MADRID, HISPANIA

SHIRIKISHO la Soka la Hispania limepigilia msumari wa mwisho katika uamuzi wake wa kumfungia straika wa Real Madrid, Cristiano Ronaldo michezo mitano.

Ronaldo alifungiwa mechi moja baada ya kutolewa katika mchezo wa kwanza wa Super Cup wa Hispania Jumapili lakini aliongezewa mingine minne- kwa kufanya kosa la kumsuma mwamuzi wa mchezo huo, Ricardo de Burgos kwa nyuma baada ya kuonyeshwa kadi nyekundu.

Supastaa huyo wa Real Madrid atakosa mchezo wa marudiano wa Super Cup dhidi ya Barcelona Jumatano usiku, na pia atakosa michezo minne ya kwanza ya La Liga, ambapo Real Madrid itaanza na Deportivo La Coruna Jumapili.

Madrid ilikata rufaa kupinga kadi ya pili ya njano aliyopewa Ronaldo katika mchezo wa ushindi wa mabao 3-1 dhidi ya Barcelona uwanjani Camp Nou.

Ronaldo alipewa kadi hiyo baada ya kujiangusha wakati akipambana na beki Samuel Umtiti ili kupata penalti lakini hakufanikiwa. 

Kabla ya tukio hilo, Ronaldo alipewa kadi ya kwanza ya njano baada ya kuvua jezi alipokuwa akishangilia bao la pili alilolifunga katika mchezo huo.

Ronaldo baada yakufunga bao la pili.

Kocha wa Madrid, Zinedine Zidane alihoji kitendo cha Shirikisho la Soka la Hispania kumfungia Ronaldo michezo mitano.  

“Tunachopaswa kufanya ni kusubiri kesho,” Zidane alisema. “Kamati inakutana asubuhi. Baada ya hapo tutajua cha kufanya. Nimekatishwa tamaa. Sote tumekatishwa tamaa. Siku zote sipendi kujihusishwa na waamuzi lakini unapoona mambo kama haya yanavyotokea...

Zidane amehoji Ronaldo kufungiwa mechi tano.

“Tutaenda kuzungumza na kamati kuhusu jambo hili vizuri. Unapofikiria kuwa hatacheza michezo mitano kwa ajili yetu, kuna kitu kinaendelea.

“Imenisumbua na imetusumbua sote. Ni michezo mingi sana kwake na hilo ndilo ninalolisema.”