PHILIPPE COUTINHO MGUU NDANI, NJE LIVERPOOL

                        LIVERPOOL, ENGLAND

PHILIPPE COUTINHO (pichani chini) ameachwa katika kikosi cha Liverpool kilichosafiri Jumatatu kwenda Ujerumani katika mchezo wa hatua ya kufuzu kwa Ligi ya Mabingwa Ulaya dhidi ya Hoffenheim, na kuongeza wasiwasi wake wa kubaki Anfield.

Coutinho mwenye umri wa miaka 25- alikosa mchezo wa ufunguzi wa Ligi Kuu England ambapo Liverpool ilitoka sare ya mabao 3-3 na Watford Jumamosi kutokana na kuwa na majeraha.

Hata hivyo, kukosekana kwake kunazua wasiwasi na kuhusishwa na jaribio lake la kutaka kujiunga na Barcelona.

Liverpool imesema Coutinho hauzwi. Wamiliki wa klabu hiyo Fenway Sports Group wametoa taarifa kuthibitisha kuwa staa huyo wa kimataifa wa Brazil ataendelea kuwa mchezaji wa timu yao hadi mwisho wa dirisha la usajili baada ya kukataa ofa ya Euro100 milioni (Pauni 90.4 milioni) kutoka Barcelona.

Hata hivyo, taarifa hiyo imetolewa kufuatia ujembe wa barua pepe kutoka kambi ya Coutinho, kiungo huyo wa zamani wa Inter Milan anataka kwenda Nou Camp katika usajili huu wa majira haya ya joto.

Habari hizo zitakuwa ni sawa na wimbo katika masikio ya maofisa wa Barcelona, wanaojipa matumaini kuwa kitendo cha mchezaji huyo kuomba kuondoka kitabadilisha mawazo ya Liverpool katika mkakati wake wa kugomea ili aruhusiwe kutua Hispania.

Hata hivyo, Coutinho hatazuiwa kuitumikia Barcelona katika Ligi ya Mabingwa Ulaya hata kama ataichezea Liverpool katika mchezo wa marudiano wiki ijayo.

Shirikisho la Soka la Ulaya limewaruhusu wachezaji kuwakilisha klabu zao katika hatua ya makundi na ile ya kufuzu.

Mchezaji mwingine aliyeachwa na Kocha Jurgen Klopp ni Daniel Sturridge, ambaye anauguza majeraha baada ya kuumia katika maandalizi ya msimu  dhidi ya Bayern Munich.