KWA MAZOEZI YA MANCHESTER UNITED YANATISHA

                    LOS ANGELES, MAREKANI

MANCHESTER UNITED mambo yake yamenoga huko Los Angeles kwenye maandalizi yao ya msimu ujao wa Ligi Kuu England baada ya mastaa wa timu hiyo kuonekana wakiwa kwenye kambi matata.

Kocha, Jose Mourinho aliungana na mastaa wake wapya kwenye mazoezi hayo, huku kila mchezaji akionekana kuwa katika ari na morali kupiga tizi la kuwaweka fiti mapema kabla ya ligi kuanza.

Katika mazoezi hayo, hakukuwa na mzaha na hayakuwa ya mchezo mchezo, ambapo Mourinho aliwagawa wachezaji wake katika makundi tofauti tofauti kulingana na matakwa ya mazoezi aliyokuwa akiwafanyisha mastaa hao.

Straika mpya, Romelu Lukaku naye alikuwa kwenye mazoezi ya timu hiyo ambapo aliungana na wenzake wapya kujiandaa na mambo ya msimu mpya. Staa mwingine mpya ni beki wa kati, Victor Lindelof.

Man United chini ya Mourinho bado wapo sokoni kusaka wachezaji wengine wakisaka kiungo mkabaji na winga, ambapo wachezaji hao wanatajwa kuwa ni Eric Dier wa Tottenham na Ivan Perisic wa Inter Milan.

Mastaa karibu wote walikuwapo mazoezini huku Man United ikijiandaa na mechi yake ya kwanza ya kupasha Julai 15 kwa kumenyana na LA Galaxy katika Uwanja wa Stubhub Centre.