ANTONIO CONTE AMMALIZA KABISA DIEGO COSTA

                       BEIJING, CHINA

ANTONIO CONTE amefunguka kwa mara ya kwanza tangu alipodaiwa kumtumia ujumbe wa kumtaarifu kutokuwa katika mipango yake ya msimu ujao straika, Diego Costa mwishoni mwa msimu uliopita.

Mwezi uliopita Gazeti la Hispania AS lilidai liliona Ujumbe Mfupi wa Maneno (SMS) ambao ulikuwa ukimfahamisha Costa kuwa hatakuwa sehemu ya wachezaji wa Ligi Kuu upande wa Chelsea msimu ujao.

Kwa mujibu wa gazeti hilo, ujumbe wote uliotoka kwa Conte ulisomeka hivi: “Hi Diego, nadhani unaendelea vizuri. Asante kwa msimu mzuri tuliokuwa pamoja. Kila la heri kwa mwaka ujao lakini hutakuwa katika mipango yangu msimu ujao.”

 “Mimi ni mchezaji wa Chelsea, lakini hawanitaki,” Costa alikaririwa akiwaambia waandishi wa habari baada ya kuitumikia Timu ya Taifa ya Hispania.

Hata hivyo, Conte amevunja ukimya kuhusu suala hilo na kudai Costa na wakala wake walishaambiwa miezi sita iliyopita kuwa nyota huyo ataondoka katika usajili wa majira ya joto.

Inadaiwa kuwa Chelsea iliamua kuachana na Costa baada ya kutaka kufuata pesa nyingi katika Ligi Kuu ya China kujiunga na klabu ya Tianjin Quanjin.

Chelsea ilizuia uhamisho huo lakini uamuzi uliofanywa na Conte baada ya hapo hakuna jinsi ya kuubadilisha.

“Sipendi kuwazungumzia wachezaji ambao hawapo hapa,” alisema Conte, kwa mara ya kwanza tangu zilipozagaa taarifa za kumtumia ujumbe Costa

Enzi za uswahiba wao ndani ya Chelsea.

“Januari, suala la Costa liliwekwa wazi. Kwa klabu, kwake na wakala wake na mimi na  likafungwa.”

Costa alikuwa mfungaji bora wa msimu kwa kupachika mabao 20 katika Ligi Kuu na Chelsea ikatwaa taji.

Anataka kurudi katika timu yake ya zamani ya Atletico Madrid na amepewa mapumziko ya ziada ili kukamilisha uhamisho wake katika usajili huu wa majira ya joto.

Baada ya kumkosa Romelu Lukaku aliyejiunga na Manchester United kwa dau la Pauni 90 milioni, Chelsea imemsajili Alvaro Morata kuziba pengo lake.

                       ... safi sana Conte akimpongeza Costa

Morata, alifanyiwa vipimo vya afya jijini London Alhamisi atavunja rekodi ya usajili ya klabu hiyo inayotakiwa kutoa Pauni 58 milioni na inaweza kupanda hadi kufikia Pauni 70 milioni.