NEYMAR KUFUNGWA JELA MIAKA MIWILI!

BARCELONA, HISPANIA

NEYMAR huenda akatumikia jela miaka miwili baada ya usajili wake wa mwaka 2013 kujiunga na Barcelona kugubikwa na sakata la rushwa.

Hayo ni mapendekezo yaliyotolewa na wanasheria wa serikali ya Hispania katika kesi inayomkabiri staa huyo na baba yake pamoja na rais wa klabu ya Barcelona wa zamani, Sandro Rosell.

Pia, waendesha mashataka hao wamemtaka Jaji, Jose Perals kumuhukumu, Rosell kifungo cha miaka mitano na kutozwa faini ya Euro 8.4 million (Pauni 7.2 milioni) kwa klabu hiyo.

Katika hatua nyingine wanasheria hao wameitaka mahakama hiyo kumfutia mashtaka rais wa sasa wa Barcelona, Josep Maria Bartomeu.

Rais Rosell, Neymar na baba mzazi wa nyota huyo wa kimataifa wa Brazili wanatakiwa kujitetea dhidi ya mashataka hayo.

Msingi wa kesi hiyo umetokana na malalamiko ya Kampuni ya Uwekezaji ya Kibrazili (DIS), ambayo inamiliki asilimia 40 ya haki ya uhamisho wa Neymar na ilidai kupokea kiasi kichache zaidi ya uhamisho halisi wa straika huyo.

Rais Rosell alijiuzulu nafasi yake hiyo mwaka 2014 na alitoa ushihidi wake mahakamani Februari sambamba na Bartomeu, Neymar na baba wa staa huyo.

Barca ilifanikiwa kutenganisha kesi hiyo Juni na kulipa faini Pauni 4.7 milioni na kukwepa mashtaka ya ukwepaji kodi katika uhamisho.

Hata hivyo, pamoja na Jaji, Jose de la Mata kukubaliana na Barca mwezi Juni, waendesha mashataka hao wa serikali wamefanikiwa kuirudisha tena kesi hiyo tena mahakamani na kutaka klabu hiyo ihukumiwe upya.

Straika mwenza wa Neymar ndani ya kikosi cha  Barcelona, Lionel Messi alihukumiwa kifungo cha miezi 21 jela kwa kosa la ukwepaji kodi mapema mwaka huu.

Messi alikata rufaa dhidi ya kifungo na katika mfumo wa sheria za Hispania kifungo chini ya miaka miwili kinaweza kuahirishwa.

Tangu amejiunga na klabu hiyo ya Nou Camp, Neymar mwenye umri wa miaka 24- ameshinda mataji mawili ya Ligi Kuu ya Hispania, La Liga,  mawili ya Copa del Rey, Ligi ya Mabingwa Ulaya, Europe Super Cup, Hispania Super Cup na Kombe la Dunia la Klabu.

Neymar amesaini mkataba wa miaka mitano na Barcelona mwezi Oktoba.