MOURINHO AMTAKA SUAREZ KWA PAUNI 135 MILIONI

BARCELONA, HISPANIA.

BARCELONA imefungua mazungumzo ya mkataba na Luis Suarez na inaamini straika huyo atasaini dili la mkataba mpya pamoja na kuahidiwa dau la uhamisho litakalovunja rekodi ya dunia na Manchester United.

Ripoti ya wiki iliyopita ilisema Kocha wa Manchester United, Jose Mourinho yuko tayari kutumia Pauni 135 milioni kumpeleka nyota huyo wa zamani wa Liverpool, Old Trafford baada ya kuchanganywa na uhaba wa mabao katika kikosi chake.

Lakini Rais wa Barca, Jose Luis Bartomeu ameweka wazi kwamba tayari miamba hiyo ya Catalunya iko katika mazungumzo na wawakilishi wa Suarez kuhusu kumuongezea mkataba mpya, kutokana na huu wa sasa kutarajiwa kumalizika msimu wa majira ya joto 2019. 

Suarez akiitumikia Barca dhidi ya Man City.

Akizungumza kuhusu tetesi zinazomuhusu nyota huyo wa kimataifa wa Uruguay mwenye umri wa miaka 29 kwenda Manchester United, Bartomeu alisema: “Tumesoma, tumesikia, tumeziona habari, lakini bila shaka, matumaini yetu katika suala hilo ni kwamba Suarez anafurahia maisha ya Barcelona.

“Kwangu binafsi, bila shaka ni straika bora Ulaya na tunataka kubaki naye. 

Suarez

“Tunajaribu kuongeza mkataba wake na Barcelona na ni mmoja kati ya matarajio yetu ya baadaye kwa sababu bado kijana, ana mtazamo wake na matumaini kibao.

“Anafuraha Barcelona na pamoja na Lionel Messi na Neymar, kwa kweli safu yao ni hatari sana.”

Hivi karibuni Barcelona iliwapa mikataba mipya, Neymar na beki Javier Mascherano, wakati ikipanga kufanya mazungumzo ya mkataba mpya na Messi mwezi ujao.

Bosi wa Manchester City, Pep Guardiola hivi karibuni alikaririwa jinsi anavyomzikia Messi na kumkaribisha mchezaji huyo Etihad kama atahitaji kuondoka Barcelona na kutaka kukabiliana na changamoto mpya.

               Mourinho anatishwa na washambuliaji wake.

Alipoulizwa kama mpanga huo una uhusiana na Man City kutaka kumnasa Messi, Bartomeu alisema: 'Hapana, siwezi kudanganya.  Huu ni uamuzi wa Messi au kwa mchezaji yeyote anayetaka kubadili klabu. 

“Mpaka sasa Messi ana mkataba nasi utakaokwisha wakati wa fainali za Kombe la Dunia (2018) na tunafurahi kuwa naye. Ni mchezaji bora wa dunia hadi sasa.”