MANCINI AFICHUA UGOMVI WAKE NA BALOTELLI

MILAN, ITALIA

ROBERTO MANCINI amevunja ukimya na kufunguka kile kilichotokea chini ya kapeti kati yake na straika mtukutu Mario Balotelli wakati kocha huyo alipokuwa akiifundisha Manchester City.

Kitendo hicho kilimpa sifa mbaya kilitokea mazoezini baada ya kuzozana na Mario Balotelli mwaka 2013. Mancini alinaswa na kamera akizozana na fowadi huyo Muitalino na akiing’ang’ania kola yake.

Na sasa bosi huyo wa zamani wa City amefafanua kwanini alikuwa  na hasira dhidi ya Balotelli.

Akizungumza na Gazeti la Ufaransa la L’Equipe, Mancini alisema: “Katika mazoezi, niliwaambia wachezaji wasifanye rafu za kijinga dhidi ya beki wa kushoto, Gael Clichy kwa sababu ndio kwanza alikuwa ametoka kwenye majeraha.

Na baadaye, Mario alimfanyia rafu mbaya sana dhidi yake. Nilikasirika.

Mancini akimvuta Balotelli.

“Nilimng’ang’ania kwenye kola yake nilitaka kumsukuma lakini alikuwa na nguvu sikuweza. Kwa kuziangalia picha unaweza kudhani labda tulipigana lakini hakukuwa na kitu kama hicho.

“Aliingia (Balotelli) kwenye ugomvi na baadhi ya wachezaji wenzake kwa sababu ya tabia yake, na alikuwa akitaka kurudi Italia. Nilikasirishwa alitaka kuondoka kwa sababu alikuwa na uwezo wa kufanya kitu kikubwa katika mashindano.”

Baada ya kushindwa kutimiza majukumu yake Manchester City na kutimuliwa kwa mara ya pili AC Milan na kushinda kufanya vizuri Liverpool sasa, Balotelli anafanya vizuri katika klabu ya Ufaransa ya Nice.

Balotelli akimchezea rafu Clichy.

Hakuna anayehoji kipaji cha Muitaliano huyo lakini siku zote amekuwa akiangushwa na tabia yake.

Baada ya kufanya vizuri akiwa na timu ya taifa ya Italia katika mashindano ya Euro mwaka 2012 -straika huyo hajachaguliwa tena katika timu hiyo tangu ilipomalizika michuano ya Kombe la Dunia kule Brazili mwaka 2014.

Mancini ambaye timu yake kuifundisha ni Inter Milan aliongeza: “Kama Mario leo hii haichezei timu ya taifa ya Italia, ni juu yake. Ni jambo la kushangaza kwamba siyo fowadi anayeanza katika timu yake ya taifa.

Wengine waliingilia kati kuamua.

“Ni straika bora wa Italia katika miaka michache ya hivi karibuni. Nina matumaini Mario anafahamu kwamba anapaswa kuwa na tabia tofauti na kufikiria soka tu. Haitakuwa vigumu kwake.”

Mancini alikuwa na matumaini makubwa kwa Balotelli alipokuwa City na alimwelezea kama mchezaji wa ajabu baada ya kuifunga Manchester United mabao 6-1 na Balotelli akaonyesha fulana yake aliyoiandika 'Why always me?’

Mancini aliongeza: “Siku ile, ilikuwa kama Mario amezaliwa upya, alikuwa mkubwa na wengine walikuwa watoto.

                                        Balotelli akiwa Nice.

Ningependezwa kumuona siku zote akiwa kama alivyokuwa kwenye derby ile, kwasababu vitu vilikuwa rahisi na vilikuja kama alivyokuwa akitaka yeye. Nilifurahi alionyesha thamani yake.

Balotelli alipofanya kile kisichotarajiwa.

“Na hata alipoonyesha fulana yake, kwa kweli nilijisemea mwenyewe kwamba ni mtu wa maajabu. Nani aliyefikiria angefanya hivyo? Ni mtu wa maajabu kwa jinsi vitu vilivyokuwa vinakuja kichwani mwake.”