RIYAD MAHREZ AOTA MBAWA ARSENAL

LEICESTER, ENGLAND

LEICESTER CITY imegoma kumuuza winga wake, Riyad Mahrez mwezi huu na  mchezaji huyo wa  kimataifa wa Algeria yuko tayari kujifunga kwa mkataba mpya, chanzo cha ndani ya klabu kimeweka wazi.

Mustakabali wa Mahrez ndani ya Leicester ulikuwa shakani katika dirisha hili la usajili wa majira ya joto kwa kuhusishwa na Arsenal na Chelsea.

Chanzo hicho kimesema kuwa Mahrez alikuwa tayari kuondoka Leicester katika usajili huu wa majira ya joto, lakini klabu imekataa kumruhusu kuondoka kama ilivyokuwa kwa N'Golo Kante aliyejiunga na Chelsea.Bosi wa Foxes, Claudio Ranieri amesema Jumatano kwamba: "Kante alikuwa na kifungu kinachomruhusu kuondoka ambacho Chelsea wamekilipia, lakini Riyad hana kifungu kama hicho hivyo ataendelea kuwa nasi.

"Mahrez alipewa ofa ya mkataba mrefu lakini ameukataa, pamoja na kwamba ofa ya mkataba wa miaka minne bado iko juu ya meza.

Mchezaji huyo mwenye umri wa miaka 25, ambaye alijiunga na Leicester akitokea Le Havre mwaka  2014, amekataa kusaini mkataba huo mpya mpaka kifungu kinachoweza kumruhusu kuondoka  kiingizwe hapo ndipo anaweza kumwaga wino.Mahrez atakuwapo kwenye kikosi kitakachoanza cha Leicester ambacho kitacheza mchezo wa ufunguzi wa Ligi Kuu  dhidi ya Hull City wikiendi hii.