ARSENE WENGER KUVUTA BEKI WA KIJERUMANI

LONDON, ENGLAND

SHKODRAN MUSTAFI yuko tayari kutua Arsenal. Wakala wa beki huyo wa Valencia, Ali Bulut amesema mteja wake ameshakubaliana na Arsenal lakini bado klabu hizo zinajadiliana kuhusu ada ya uhamisho.

Bulut alisema kwamba beki huyo wa kimataifa wa Ujerumani mwenye umri wa miaka 24, amekubaliana maslahi binafsi na yuko tayari kutua uwanjani Emirates.

"Shkodran na Arsenal wameshakubaliana. Kilichobaki ni klabu tu kufukia mwafaka wa ada ya uhamisho," alisema Bulut.

Habari zinasema kwamba Arsenal ilikuwa tayari kutoa  dau linalokadiriwa kufikia Pauni 20 millioni kwa ajili ya Mustafi, na wengine wakidai kwamba inaweza kufika  Pauni 30 milioni.

Arsenal inahitaji kupata beki wa kati baada ya mabeki wake Per Mertesacker na Gabriel Paulista kuumia kipindi cha maandalizi ya msimu na watachukua muda mrefu kupona.

Hata hivyo, Kocha Arsene Wenger alisema hatarajii kumleta beki mpya kwa ajili ya mchezo wa kwanza wa Ligi Kuu dhidi ya Liverpool, Jumapili.

Kocha Wenger

Mustafi, aliisaidia Ujerumani kushinda Kombe la Dunia mwaka 2014 na aliitumikia nchi yake katika michuano ya Euro 2016, uwezoefu wake utamfanya Wenger amfanye kuwa patna wa Laruent Koscielny, ambaye anatarajiwa kuwa fiti kwa ajili ya mchezo wa Liverpool.

Beki huyo ameshatakiwa na Arsenal na hata Manchester United kwa nyakati tofauti.