WENGER AMFANYIA KITU MBAYA THIERRY HENRY

LONDON, ENGLAND

ARSENE WENGER  amemfanyia kitu mbaya staa wake wa  zamani, Thierry Henry ambaye alikuwa kocha wa vijana chini ya umri wa miaka 18 wa klabu ya Arsenal.

Wenger alimwambia Henry aamue jambo moja kati ya kuendelea kuwa mchambuzi wa soka katika Kituo cha Skysport anakolipwa dau la Pauni 4 milioni kwa mwaka, au aendelee kuwa kocha wa vijana wa Arsenal chini ya umri wa miaka 18.

Henry ambaye alikuwa anafanya kazi siku nne kwa wiki katika kikosi hicho cha vijana ameamua kuachana na kazi hiyo na kuendelea kuchambua soka huku ikidaiwa kuwa atafanya katika klabu nyingine za London.

“Ningependa kumshukuru Andries Jonker kwa kunipa nafasi ya kufundisha U18 Arsenal, nilihisi heshima kubwa na nilikubali. Hata hivyo naheshimu maamuzi ya Arsene Wenger na nataka kumtakia kila la kheri kocha wao, Kwame Ampadu, wachezaji na kila mmoja klabuni. Kila la kheri kwa msimu wao mpya.” Ilisema taarifa ya Henry.

Kuonyesha kuwa alikuwa na mapenzi na Arsenal huku pesa ikiwa sio tatizo kwake baada ya kuvuna utajiri mkubwa katika maisha yake ya soka, Henry aliwapa Arsenal ofa ya kuifundisha timu hiyo bure bila ya malipo yoyote lakini bado Wenger amempa sharti hilo.

Habari za ndani zinadai kwamba Wenger alikerwa na kitendo cha Henry kumkosoa vikali mshambuliaji wake namba moja wa sasa, Olivier Giroud huku akidai kwamba Arsenal haitaweza kutoa ushindani wa kuchukua ubingwa wa England kama Giroud ataendelea kuwa mshambuliaji namba moja klabuni hapo.

Wenger, ambaye yeye mwenyewe amekuwa akifanya kazi ya uchambuzi wa michuano mikubwa katika kituo cha beIN Sports cha Ufaransa timu yake ilimaliza nyuma ya mabingwa Leicester City pointi 10 nyuma ya wababe hao wapya.

Watu wenye ushawishi mkubwa ndani ya Arsenal inasemekana wameshtushwa na kitendo cha Wenger kumuonyesha mlango wa kutokea nyota huyo ambaye ni mfungaji bora wa muda wote Arsenal huku pia akitajwa kuwa mchezaji bora wa muda wote kuwahi kutokea Arsenal.

  Indaiwa pia kuwa Wenger, ambaye amebakiza mwaka mmoja katika mkataba wake wa sasa alikuwa na wasiwasi kuwa Henry alikuwa anainyemelea nafasi yake klabuni hapo wakati huu mashabiki wa Arsenal wakishinikiza mastaa wa zamani wapewe nafasi ya kuifundisha Arsenal.

Kwa kuondoka Arsenal pia, nyota huyo anaungana na mastaa wa zamani wa Arsenal ambao wameamua kufanya kazi kwingineko licha ya umaarufu mkubwa walioupata Highbury kisha Emirates. Mastaa hao ni kama vile, Patrick Vieira, Dennis Bergkamp, Marc Overmars na Mikel Arteta ambaye amestaafu soka mwishoni mwa msimu uliopita na amejiunga katika benchi la ufundi la kocha, Pep Guardiola.

Mlinzi wa zamani na nahodha wa muda mrefu wa Arsenal, Tony Adams hivi karibuni alikubali kuwa msaidizi katika timu ya vijana ya Arsenal na alitarajiwa kufanya kazi sambamba na Henry ambaye sasa ameamua kuondoka.

Henry anaondoka Ligi Kuu ya England akiwa na mataji mawili ya Ligi Kuu ya England, matatu ya FA huku akifunga mabao 228 katika mechi 376 na hivyo kuwa mfungaji bora wa muda wote katika historia ya Arsenal. Alinunuliwa rasmi Arsenal Agosti 3, 1999 kwa dau la Pauni 11 milioni akitokea Juventus kwa ajili ya kuungana na Wenger ambaye aliwahi kumfundisha Monaco.