URENO YAPEWA MAPOKEZI MAZITO LISBON

LISBON, URENO

CRISTIANO RONALDO na wenzake wa Ureno wamewasili nyumbani  katika Jiji la Lisbon baada ya kuushtua ulimwengu kwa kutwaa taji la Euro 2016.

Taji hilo halikuwa mbali ya mikono ya  nahodha Ronaldo, ambaye pamoja na kikosi kizima kilipewa mapokezi makubwa  baada ya kutua katika Uwanja wa Ndege wa  Humberto Delgado.

Mara baada ya kutua, ndege yao ilipokelewa kwa  kurushwa maji  yenye rangi nyekundu  na kijani juu ya ndege hiyo.
Kwa ushindi huo ambao haukutarajiwa ulilazimisha kujengwa kwa uzio mzito  katika mapokezi hayo ya Lisbon, ambapo maelfu ya mashabiki walifurika mitaani, wakicheza, wakiimba na kupunga mikono wakiwa na bendera za Ureno zenye rangi nyekundu na kijani.

Sherehe ziliendelea Jumatatu, na Ronaldo na wenzake walitua   katika uwanja huo wa ndege  saa 5:15 na kwenda  kumuona Rais, Marcelo Rebelo de Sousa katika makazi yake ya serikali kabla ya gwaride kuingia katika mitaa ya Lisbon.
Na Rais alisema : " Sisi ndio bora Ulaya. Tumeonyesha kile tulichokifanya: nguvu, umoja, tumeweza kushinda mambo yote magumu ikiwemo kuumizwa na kumkosa Cristiano Ronaldo."

Ndoto za Ureno kulibeba taji hilo ziliingia katika wasiwasi mkubwa  baada ya Ronaldo kuumizwa, nahodha na hirizi hiyo ya Ureno, alianguka uwanjani katika dakika ya nane  kufuatia kuumizwa na Dimitri Payet.

Baada ya kutibiwa mara mbili na kujaribu kurudi uwanjani, Ronaldo alishindwa kuendelea na mchezo na kutolewa.
 Ufaransa iliendelea kutawala mchezo dhidi ya Ureno na pongezi ziende kwa mchezaji bora wa mechi, beki Pepe na kipa Rui Patricio aliyeokoa hatari kadhaa.

Katika hatua nyingine, Ronaldo alisema: " Haikuwa fainali niliyoitaka  lakini nina furaha kubwa. Ni Kombe la Wareno wote, kwa wahamiaji wote, kwa watu wote waliotuamini,  kwa hiyo nina furaha na ninajivunia."