LIONEL MESSI BABA YAKE JELA MIEZI 21

BARCELONA, HISPANIA

USHTUKE ndiyo sheria hiyo. Lionel Messi amehukumiwa kifungo cha miezi 21 jela kutokana na kukutwa na hatia ya kukwepa kulipa kodi.

Mamlaka za kodi za Hispania zimemfikisha mahakamani Messi pamoja na baba yake, Jorge Messi wakihusika katika  kitendo cha kukwepa kulipa kodi kati ya mwaka 2007 na 2009.

Baba wa supastaa huyo wa Barcelona, Jorge naye amehukumiwa kifungo cha jela kutokana na kukwepa kulipa kodi kiasi cha Pauni 3.5 milioni kwa kipindi cha miaka miwili.

Wawili hao pia wamepigwa faini ya mamilioni kwa kutumia kampuni zao za huko Belize na Uruguay ambazo zimekuwa hazilipi kodi kutokana na mapato yanayopatikana kutokana na mauzo ya taswira za mwanasoka huyo bora wa dunia mara tano.

Hata hivyo, Messi na baba yake wanaweza wasifungwe jela. Kwa mujibu wa sheria za Hispania, hukumu ya kifungo cha chini ya miaka miwili, mtuhumiwa anaruhusiwa kutumikia kifungo chake nje akiwa chini ya uangalizi.

Mwanasoka huyo na baba yake walikutwa na hatia kwa makosa matatu ya kukwepa kodi  Jumatano na mahakama moja huko Barcelona.

Wakati akijibu mashtaka hayo, Messi alidai kwamba hakuwa akitambua kitu kilichokuwa kikifanywa na uongozi wake kwenye masuala ya pesa na kusema alichokuwa akikifanya ni kucheza soka.

Messi amepigwa faini ya Pauni 1.7 milioni, wakati baba yake amepigwa fainali ya Pauni 1.5 milioni.

Wachezaji wengine waliokumbana na kasheshe la masuala ya kukwepa kodi ni Neymar, Javier Mascherano, Adriano na Xabi Alonso.