JOSE MOURINHO AMCHUNIA SHABIKI WA CHELSEA

SHANGHAI, CHINA

KUNA watu wanapenda sana uchokozi. Huko China kuna shabiki mmoja alimjaribu Jose Mourinho alipotua huko na kikosi chake cha Manchester United.

Wakati mashabiki kibao wakiwa wamepanga mstari kuwapokea mastaa wa kikosi cha Man United pamoja na kocha wao mpya Mourinho ili pia wawasainie jezi zao, kuna shabiki mmoja amemjaribu Mreno huyo kwa kumpelekea jezi ya Chelsea.

Sawa, Mourinho hata hata mwaka mmoja tangu aachane na klabu hiyo ya Stamford Bridge, lakini unajua alichokifanya? Alimchunia shabiki huyo aliyekuwa ameshika jezi ya Chelsea ile ya zamani yenye udhamini wa Samsung kifuani kama hajamwona vile. Mourinho hakuisaini jezi hiyo.

Badala yake aliandelea kufanya hivyo kwa kuzisaini jezi za Man United na vitabu na majarida mengine ya mashabiki hao walioenda nayo mashabiki kwa ajili ya kupata saini za wakali kutoka kikosi hicho cha Old Trafford.

Hata hivyo, Mourinho hakuonyesha sura ya hasira kutokana na jaribio la shabiki huyo kuona kama bado ana mapenzi na klabu hiyo aliyowahi kuinoa katika nyakati mbili tofauti na kufanikiwa kuipa mataji matatu ya Ligi Kuu England.

Kocha huyo wa zamani wa FC Porto, Inter Milan na Real Madrid alionyesha kutabasamu tu kabla ya kumtambuka shabiki huyo na kuendelea na mambo mengine ya kusaini jezi za mashabiki wengine.

Man United jana Ijumaa ilitarajiwa kumenyana na Borussia Dortmund katika moja ya mechi za kirafiki kujiandaa na msimu mpya wakati Jumatatu itakipiga na mahasimu wao Manchester City huko huko China.