WAYNE ROONEY ACHUKIZWA NA VAN GAAL

MANCHESTER, ENGLAND

BOSI wa Manchester United, Louis van Gaal amekiri straika wake, Wayne Rooney alipandwa na hasira baada ya kutolewa katika mchezo wake wa kwanza Old Trafford baada ya kupona majeraha ya goti.

Rooney hakucheza vizuri katika ushindi wa bao 1-0 dhidi ya Aston Villa na mashabiki walikuwa wakimpigia kelele kwa kumfananisha na Gabriel Agbonlahor wa Villa ambaye amekuwa mzito. Nahodha huyo wa United mara ya mwisho kucheza mchezo wa Ligi Kuu ilikuwa ni Februari 13 dhidi ya Sunderland,  alianzisha mpira ambao Marcus Rashford alifunga bao hilo katika dakika ya 32 ya kipindi cha pili lakini alitolewa katika dakika ya 67 na nafasi yake kuchukuliwa na Jesse Lingard. 

Jesse Lingard akingia, Rooney akitoka

“Alinichukia kwa sababu alikuwa anataka kucheza kwa dakika 90,” alisema Van Gaal. “Lakini mliweza kuona alivyokuwa akipoteza mipira – hajacheza kwa muda mrefu na siku tatu za mazoezi haziwezi kutosha.

...akiwajibika uwanjani.

“Alicheza vizuri katika kipindi cha kwanza lakini hakufanya vizuri katika kipindi cha pili. Si jambo la kushangaza kwa sababu mzuka wa Ligi Kuu uko juu sana na hajarudi katika ubora wake. Lakini sijaumizwa na kitendo chake hicho, inaonesha ana ari ya kucheza dakika 90.”

Rooney alianza kwa kucheza juu na Rashford lakini alishuka chini wakati mchezo ulipokuwa ukiendelea. Mpira wa faulo wa haraka aliompigia Antonio Valencia ulimkuta Rashford aliyefunga akiwa nje ya yadi nane kutoka lango la adui.

“Lilikuwa pia bao la Rooney nadhani ,” alisema Van Gaal.

Kutokana na Rooney kuvaa jezi ya nyekundu na nyeupe ya United ni habari nzuri kwa kocha wa England, Roy Hodgson ambaye amepanga kumchukua straika huyo mwenye umri wa miaka 30 kwenye fainali za Euro 2016.