NA
ABEID POLO
WAYNE
Rooney anasubiri kuzaliwa upya msimu ujao. Maisha yake ya ndani ya Man United
yatakuwa matamu zaidi kama Jose Mourinho atatua mahali hapo. Rooney ni aina ya
mchezaji ambaye Mourinho alipenda sana afanye naye kazi.
Wakati
alipokuwa Chelsea, Mourinho mara kadhaa alisikitika kuikosa huduma ya Wayne
Rooney. Sikitiko lake Mourinho ni kwamba hakuwa na Namba 10 aliyemhitaji
klabuni hapo, ambaye angecheza kama Rooney.
Rooney
ni mchezaji ambaye alikuwa na uwezo wa kupokea pasi, akaimalizia vizuri kuwa
bao. Ni mchezaji mwenye uwezo kurudi nyuma kukaba. Mchezaji anayeweza kufuata
maelekezo vizuri na si mbinafsi. Mourinho hakuwa na mtu wa aina hiyo kwenye
kikosi chake cha Chelsea baada ya kina Frank Lampard kuondoka. Ndiyo maana
alimhitaji sana Rooney. Sasa maisha ya wawili hao yatakuwa matamu zaidi
watakapokutana Old Trafford msimu ujao.
Mourinho, anatarajiwa kutua Old Trafford.
Mourinho
shida yake anamtaka namba 10 anayekaba pia. Kwenye kikosi cha Chelsea alikuwa
na Eden Hazard, Kevin De Bruyne, Pedro, Willian, Andre Schurrle, Oscar na Juan
Cuadrado, hawa kwa nyakati tofauti aliwahi kuwachezesha kwenye namba 10.
Matokeo yake hayakuwa matamu sana na ndiyo maana mara nyingi alihusudu kuwa na
huduma ya Rooney kwenye kikosi chake. Jambo hilo ndilo linaloyafanya maisha ya
Rooney kutarajiwa kuwa tofauti msimu ujao. Man United kwa sasa inakokotoa
hesabu za fidia itakazomlipa kocha wake wa sasa, Louis van Gaal ili kumpisha
Mourinho klabuni hapo.
United inatambua kwamba kumwondoa Van Gaal kwa
sasa kutawaingiza kwenye gharama kubwa zaidi kwa sababu italazimika kumlipa kwa
muda wote wa mkataba wake uliobaki na ndio maana inasubiri hadi mwishoni mwa msimu kuona timu itakuwa imemaliza kwenye
nafasi gani na kufanya uamuzi.
Kwa
kipindi hicho italazimika kumlipa asilimia 15 ya sehemu ya mkataba uliobaki
kama fidia.
Man
United inafahamu wazi kuendelea kuwa na Mdachi huyo kuna baadhi ya wachezaji
mastaa haitaweza kuwapata. Mmoja wapo ni Zlatan Ibrahimovic. Baada ya kile
kilichotokea kwa mastaa wengine makini wa Man United, kama Angel Di Maria,
wachezaji wengi wanaogopa kwenda kuwa chini ya Mdachi huyo.
Rooney na Van Gaal
Hivi
karibuni, Man United iliwafuatilia wachezaji Renato Sanches, Bernardo Silva na
Andre Gomes wakiwataka wachezaji hao wajiunge na timu yao msimu ujao. Lakini,
tatizo lililopo ni kwamba wachezaji hao wapo chini ya wakala Jerge Mendes na
Mreno huyo hayupo tayari kufanya biashara na kuwapeleka nyota wake kuwa chini
ya kocha huyo hasa baada ya kile kilichotokea kwa Di Maria na Falcao.
Man United itaweza kupata huduma za wachezaji
hao kama tu kocha wao atakuwa Mourinho. Ujio wa Mourinho pia utawavutia mastaa
wengine wa maana kwenda kujiunga na timu hiyo ya Old Trafford huku kukiwa na
matarajio ya kumshuhudia Rooney kwenye ubora wake mpya.
Post a Comment