SIR ALEX FERGUSON AMPA ONYO KALI GUARDIOLA

MANCHESTER, ENGLAND

SIR ALEX FERGUSON amemuonya kocha mtarajiwa wa Manchester City, Pep Guardiola.

Ferguson ambaye ni kocha wa zamani wa Manchester United, amemwambia Guardiola kwamba asitegemee mteremko katika Ligi Kuu ya England kama alivyoupata akiwa na Barcelona ya Hispania katika La Liga, au na Bayern Munich katika Bundesliga.

Babu Ferguson ambaye kwa sasa ana miaka 74 anaamini kwamba Man City imeokota dhahabu kwa kufanikiwa kumnasa Guardiola kutoka Bayern Munich, lakini anaamini kwamba itakuwa vigumu kwa Mhispaniola huyo kurudia mafanikio yake akiwa Ligi Kuu ya England na Man City.

“Itakuwa vigumu sana kwake kurudi kile alichokifanya Barcelona. Ni wazi kwamba Man City imelamba dume kumpata kwa sababu ni bonge la kocha lakini Pep hatapata njia rahisi sana Ligi Kuu ya England,” alisema Ferguson.

“Soka la Kiingereza sio rahisi. Kila kocha wa kigeni ambaye amekuja England atakwambia hivyo. Arsene Wenger, baada ya miezi michache alikuwa anaongelea jambo hilo hilo. Jose Mourinho baada ya msimu wake wa kwanza alitambua kwamba angeweza kufanikiwa kwa kufanya kazi ngumu sana,” aliongeza Ferguson.

Guardiola

“Nadhani Pep atapata mafanikio, lakini sidhani kama ataweza kurudia kile alichokifanya Barcelona. Kile kilikuwa kiwango kikubwa. Walikuwa katika ubora wao.”

Ferguson amepoteza mechi mbili za fainali kwa Guardiola. Fainali ya kwanza ilikuwa mwaka 2009 wakati walipochapwa mabao 2-0 dimba la Olimpiki katika Jiji la Rome kwa mabao ya Samuel Eto’o na Lionel Messi.

Fainali nyingine ni ya mwaka 2011 wakati walipochapwa mabao 3-1 dimba la Wembley ardhi ya nyumbani England kwa mabao ya Pedro, David Villa na Lionel Messi huku la United likifungwa na Wayne Rooney.

Ferguson na Guardiola

Pamoja na vichapo hivyo, Ferguson anakiri kumkubali Guardiola kwa kazi nzuri anayoifanya katika timu zake anazofundisha na amewaonya wachezaji legelege wa Manchester City kuwa wasitarajie kufanya kazi nyepesi kwa Guardiola.

“Pep bila shaka ana nidhamu kubwa ya kazi yake. Anahimiza sana hilo katika mazoezi yake yote kwa hiyo yeyote ambaye anafikiria hatafanya kazi kubwa, basi hatadumu muda mrefu kwake. Nina uhakika na hilo, ana uwezo mkubwa sana wa ukocha,” alisema Ferguson.