RONALDO HATARINI KUIKOSA MACHESTER CITY

MADRID, HISPANIA

KOCHA wa Real Madrid, Zinedine Zidane amesema, straika wake wa Real Madrid, Cristiano Ronaldo hatacheza mchezo wa Ligi ya La Liga Jumamosi dhidi ya majirani zao, Rayo Vallecano, lakini  kuna wasiwasi mkubwa anaweza kuukosa mchezo wa Ligi ya Mabingwa Ulaya dhidi ya Manchester City kutokana na kuumia misuli.

Ronaldo amepatwa na tatizo la misuli katika dakika za mwisho za mchezo dhidi ya Villarreal Jumatano iliyopita ambapo timu yake ilishinda mabao 3-0.
Uwezekano wa Mreno huyo kucheza Mchezo wa Ligi ya Mabingwa Ulaya hatua ya nusu fainali ya kwanza Jumanne ijayo dhidi ya Manchester City bado iko shakani.
Ronaldo alitoka katika mchezo huo akiwa anachechemea baada ya kuumia.

Zidane akimwangalia kwa uchungu.

Baada ya kuchukulikuwa vipimo Alhamisi na Ijumaa katika mji mkuu wa Hispania, Madrid imesema, Ronaldo mwenye umri wa miaka 31alikutwa na tatizo la misuli katika mguu wa kulia bila ya kusema ni lini ataweza kurudi uwanjani.
Kocha huyo wa Blancos amezungumza na waandishi wa habari Ijumaa katika mkutano na kudai kwamba, Ronaldo atapewa uangalizi wa karibu, kwa kuwa Madrid iko katika mbio za ubingwa wa Liga na straika huyo anafukuzia kiatu cha mfungaji bora katika ligi hiyo, hata hivyo, hatacheza Jumamosi.
"Kesho (Ronaldo) hatacheza," Zidane alisema. "Tumemfanyia vipimo na hajaumia sana, lakini hataweza kucheza kesho. Tutamwekea uangalizi wa karibu. Kesho atabaki nyumbani. Kisha tutaangalia kuhusu Jumanne."
Zidane alikiri baada ya mchezo wa Jumatano kwamba alitaka kumpumzisha Ronaldo kwa kuhofia majeraha, lakini ilikuwa ni vigumu kwa kuwa straika huyo anataka kucheza kila mchezo.

"Labda anaweza kupumzika siku nyingine, lakini ni kitu kizuri, mchezaji ambaye kila siku anataka kucheza, kuisaidia timu, kila siku anataka kupata zaidi na zaidi," alisema.

...akifanya vitu vyake.

"Kwa kocha hilo ni jambo kubwa. Ndani ya mambo mabaya kuna mengi mazuri. Amekuwa katika wakati mzuri. (majeraha) lilikuwa ni tukio la kipekee, katika dakika za mwisho chochote kinaweza kutokea. Lakini nimemuona yuko vizuri, kucheza muda wote. Kila wakati amefanya hivyo. Kwa kocha ni vizuri kuwa na mtu kama huyo. Nifakiria kwa upande wa faida-kile tunachokipata katika timu."