BOSI AMRUDISHA DIEGO COSTA KUNDINI

                     LONDON, ENGLAND

CHELSEA imekaa chini na kutafakari kisha kuamua kumrudisha kikosini straika wake, Diego Costa.

Inadaiwa bosi mkuu wa  mabingwa hao wa Ligi Kuu England, amemwamuru Costa kurejea London na kujiunga na kikosi hicho na kufanya mazoezi na kikosi cha kwanza baada ya kugoma akiamini hicho kitakuwa kipimo kama anataka kuuzwa Altetico Madrid.

Chelsea imetoa masharti manne kwa Costa ambaye amegoma kurejea London na kubaki Brazil.

Taarifa iliyotolewa Jumanne na uongozi wa klabu hiyo imeeleza Chelsea imempa masharti manne staa huyo mwenye asili ya Brazil.

Diego Costa anatakiwa kurudi London kujiunga na wenzake mazoezini, aimarishe kiwango chake kwenye mechi na aongeze juhudi ili kuwapo kikosi cha kwanza.

Jumatatu Diego Costa aliuambia Mtandao wa Daily Mail kuwa amehudhunishwa jinsi anavyochukuliwa kama mhalifu na timu hiyo baada ya kufukuzwa kwa SMS na Kocha Conte.

Costa alisema, Chelsea ilimwekea masharti ya kufanya mazoezi na wachezaji wa akiba, kutoruhusiwa kuingia katika vyumba vya kubadilishia nguo vya wachezaji wa kikosi cha kwanza na kutozungumza nao.

“"Wanataka nikafanye mazoezi na kikosi cha akiba, siruhusiwi kabisa kuwasogelea mastaa wa kikosi cha kwanza. Mimi siyo mhalifu, sidhani kama ni haki kunifanyia hivi kwa mambo yote niliyowafanyia," alikaririwa Costa.

Chelsea imeshampiga faini Costa ya Pauni 300,000 kwa kushindwa kuripoti klabuni wiki mbili zilizopita kwa kukata mshahara wake anaochukua Pauni 15,000 kwa wiki.

Straika huyo alisema hajali na anachotaka ni kuondoka bure kujiunga na timu yake ya zamani ya Atletico Madrid.

Hata hivyo, agizo hili la kiongozi wa juu wa Chelsea huenda likamrudisha Costa mazoezini muda wowote tangu lilipotolewa Jumanne.

Costa aliwahi kutuma video katika mtandao wake wa Instragam akionekana akifanya mazoezi katika ufukwe wa Brazil.

Katika mchezo wake wa kwanza wa Ligi Kuu, Chelsea ilichezea kichapo cha mabao 3-2 kitu ambacho kinaweza kuwa sababu ya straika huyo kurudishwa kundini.