KUMBE HUYU MBAPPE MSUMBUFU NAMNA HII!

                          MONACO, UFARANSA

AS Monaco inajipanga kumpoteza straika wao Kylian Mbappe. Lakini, Nike nao wapo kwenye hatari ya kumpoteza straika huyo na kwenda kwa wapinzani wao Adidas.

Kila kitu kina wakati wake na huu ni wakati wa Mbappe kukimbiza huko Ulaya ndani na nje ya uwanja.

Wakati staa huyo akiwindwa na klabu vigogo kama Real Madrid, Liverpool, Arsenal na vigogo wengine kibao baada ya kucheza kwa kiwango kikubwa sana kwa msimu uliopita ambapo alifunga mabao 26 akiwa na kikosi cha Monaco.

Staa huyo akisababisha vita kali kwa klabu, anaibua vita nyingine kali kwa wapinzani wawili watengeneza vifaa vya michezo, Adidas na Nike.

Mbappe, 18 amekuwa na mkataba wa Nike tangu alipoanza kucheza soka la kulipwa, lakini wakati dili hilo likielekea ukingoni, Adidas sasa wanajiandaa kumpa dili tamu zaidi.

Katika hilo, kampuni hiyo ya Ujerumani inajiandaa kumfanya Mbappe kuwa mchezaji anayelipwa pesa nyingi kwa mwaka, Pauni 4.4 milioni, kitu ambacho atakuwa anampiku Mfaransa mwenzake, Paul Pogba wa Manchester United, anayelipwa Pauni 3.1 milioni kwa mwaka.